खर्च व गुंतवणूक यातील फरक समजा

खर्च व गुंतवणूक यातील फरक समजा 

प्रश्न : मी रियल इस्टेट व्यवसायिक आहे. व्यवसाय वाढीसाठी चांगले इंटिरियर, एसी, गाडी यासाठी २० लाख रुपये खर्च करावा, असे काहीजण सुचवतात. हा खर्च योग्य आहे का? 

उत्तर : प्रथम तुम्ही खर्च व गुंतवणूक यांतील मूलभूत फरक लक्षात घ्या. खर्च म्हणजे ज्यातून तुम्हाला कोणताही परतावा येत नाही. उदा. मुलांची मोठी लग्ने, बेंजो, फेटे इत्यादी दिखाव्यावर पैसे उधळणे, हा झाला उधळपट्टीयुक्त खर्च. शिक्षण, आरोग्य, अन्न, घर यासाठी येणारा खर्च हा जीवनावश्यक खर्च होय. उद्योग वाढवण्यासाठी दुकान व कार्यालयाला चांगले फर्निचर करणे, चांगली गाडी घेणे, चांगला एसी, टी मशीन इत्यादी सुविधांवर खर्च करणे, चांगला कर्मचारी नेमणे याला खर्च नव्हे तर गुंतवणूक म्हणतात. व्यवसायाच्या जाहिरातीवर केलेला खर्च हा खर्च नसून गुंतवणूक होय. जसे आपण आंब्याच्या रोपट्याला खतपाणी, औषधे देतो व त्याची परिणीती पुढे चांगले आंबे लागण्यास होते. व्यावसायिकाने आपले व्यक्तिमत्व सुधारण्यासाठी इंग्लिश स्पीकिंग क्लास, कॉम्प्युटर क्लास, पर्सनालिटी डेव्हलपमेंट कोर्स इत्यादी खर्च ही सुध्दा गुंतवणूक होय. तुमचा व्यवसाय जर ५० लाखांपर्यंतचा असेल व मार्जिन ५० टक्के असेल तर जाहिरातींवर अंदाजे ३ ते ५ लाख रुपये, कार्यालय सुशोभीकरण १ ते ३ लाख रुपये, पर्सनालिटी डेव्हलपमेंटवर २० हजार ते १ लाख रुपये गुंतवणूक करावी. ही गुंतवणूक व्यवसायाचे स्वरूप, ठिकाण व वेळेनुसार कमीजास्त असू शकते. 

“Wise spending is part of wise investing” 

एका बड्या बँक अधिकाऱ्याच्या गृहप्रवेश कार्यक्रमाचे निमंत्रण आले. या शुभप्रसंगी त्यांना मी २५ हजार रुपये किंमतीची जयपुरी कोरीवकाम केलेली गणेश मूर्ती भेट दिली. त्यातून खूप चांगले संबध प्रस्थापित झाले. पुढे त्यांनी आमच्या काही कोटींच्या फाईल्स पास केल्या. चांगले संबध प्रस्थापित करण्यासाठी गेलेला पैसा खर्च नसून ती गुंतवणूक आहे. कर्ज काढून बिनकामाच्या गावाला जेवायला बोलावून काय उपयोग? तुमचीच बुंदी खाऊन तुमच्याच मांडावाला हात पुसून जातात व म्हणतात “ह्याच्यात काय दम आहे मोठं लग्न करण्याचं? कर्ज झालेवर जमीन विकेल हा..!”